മേടം രാശി (അശ്വതി, ഭരണി, കാർത്തിക ആദ്യ കാൽഭാഗം):
ഈ വാരം ഗുണദോഷ സമ്മിശ്രമായിരിക്കും. വാരത്തിന്റെ തുടക്കത്തിൽ ചില ആരോഗ്യ പ്രശ്നങ്ങൾ അലട്ടാൻ സാധ്യതയുണ്ട്. മാനസികമായ ബുദ്ധിമുട്ടുകൾ അനുഭവിക്കുന്നവർ കാര്യങ്ങളിൽ കൂടുതൽ ജാഗ്രത പുലർത്തുക. വാരമധ്യത്തിൽ കുടുംബത്തിൽ സന്തോഷകരമായ അന്തരീക്ഷം രൂപപ്പെടും. പുതിയ തൊഴിൽ അവസരങ്ങളോ ബിസിനസ്സ് സംരംഭങ്ങളോ ലഭിക്കാൻ സാധ്യതയുണ്ട്. വാരത്തിന്റെ അവസാനത്തിൽ, ജീവിത പങ്കാളിയുമായും കുടുംബാംഗങ്ങളുമായും അഭിപ്രായ വ്യത്യാസങ്ങൾ ഉണ്ടാകാൻ ഇടയുണ്ട്. കൂടാതെ, കുടുംബത്തിൽ ആർക്കെങ്കിലും ആരോഗ്യക്കുറവോ ആശുപത്രിവാസമോ വേണ്ടിവരാനും സാധ്യത കാണുന്നു.
ഇടവം രാശി (കാർത്തിക അവസാന മുക്കാൽ ഭാഗം, രോഹിണി, മകയിര്യം ആദ്യ പകുതിഭാഗം):
ഈ വാരത്തിന്റെ തുടക്കത്തിൽ മനഃസന്തോഷം, ബിസിനസ്സിൽ ലാഭം, പുതിയ വീടോ ആഭരണങ്ങളോ സ്വന്തമാക്കാനുള്ള സാധ്യത, അതുപോലെ നല്ല സുഹൃദ്ബന്ധങ്ങൾ എന്നിവയുണ്ടാകും. എന്നാൽ, വാരമധ്യത്തിൽ അനാവശ്യമായ കൂട്ടുകെട്ടുകൾ മൂലം അപവാദങ്ങൾ കേൾക്കുവാനോ സാമ്പത്തിക നഷ്ടത്തിനോ ഇടയുണ്ട്. ചിലർക്ക് അപ്രതീക്ഷിതമായി ഭാഗ്യാനുഭവങ്ങൾ ഉണ്ടാകും. ധനലാഭം, ദാമ്പത്യ സൗഖ്യം, ബന്ധുജന സമാഗമം എന്നിവയും പ്രതീക്ഷിക്കാം. എങ്കിലും വാരത്തിന്റെ അവസാനത്തിൽ ദാമ്പത്യ ജീവിതത്തിൽ അകൽച്ച, മാനസിക ക്ലേശം, ആരോഗ്യ പ്രശ്നങ്ങൾ എന്നിവ ഉണ്ടാവാൻ സാധ്യതയുണ്ട്..
മിഥുനം രാശി (മകയിര്യം അവസാന പകുതിഭാഗം, തിരുവാതിര, പുണർതം ആദ്യ മുക്കാൽഭാഗം):
ഈ വാരം ഗുണദോഷ സമ്മിശ്രമാണ്. വാരത്തിന്റെ തുടക്കത്തിൽ ജീവിത പങ്കാളിയുമായും സന്താനങ്ങളുമായും അഭിപ്രായ വ്യത്യാസങ്ങൾ ഉണ്ടാകാൻ സാധ്യതയുണ്ട്. എല്ലാ കാര്യങ്ങളിലും തടസ്സങ്ങൾ, അപമാനം, ധനനഷ്ടം, കാർഷിക മേഖലയിൽ നഷ്ടങ്ങൾ എന്നിവയ്ക്കും സാധ്യത കാണുന്നു. എന്നാൽ വാരമധ്യത്തോടെ തൊഴിലിൽ ലാഭവും മനഃസന്തോഷവും ഉണ്ടാകും. വാരത്തിന്റെ അവസാനത്തോടെ ഭക്ഷണ സൗഖ്യം, സ്ത്രീകളുമായി അടുത്തിടപഴകാനുള്ള അവസരങ്ങൾ, ശത്രുക്കളെ അതിജീവിക്കാനുള്ള സാധ്യത, കോടതി കേസുകളിൽ അനുകൂലമായ വിധി എന്നിവയുണ്ടാകും.
കർക്കിടകം രാശി (പുണർതം അവസാന കാൽഭാഗം, പൂയം, ആയില്യം):
വാരത്തിന്റെ തുടക്കത്തിൽ വ്യവഹാര വിജയവും ധനലാഭവും പ്രതീക്ഷിക്കാം. ഉന്നത സ്ഥാനലബ്ധി, തൊഴിൽ വിജയം, ദാമ്പത്യ ഐക്യം, നല്ല സുഹൃത്തുക്കളെ ലഭിക്കാനുള്ള യോഗം എന്നിവയ്ക്കും സാധ്യതയുണ്ട്. എന്നാൽ വാരമധ്യത്തോടെ സ്വന്തമായോ ജീവിത പങ്കാളിക്കോ സന്താനങ്ങൾക്കോ ആരോഗ്യക്കുറവ് അനുഭവപ്പെടാൻ ഇടയുണ്ട്. അതുമൂലം മനോദുഃഖം ഉണ്ടാവാം. സാമ്പത്തിക ക്ലേശവും തൊഴിലിൽ തിരിച്ചടികളും അനുഭവപ്പെടാൻ സാധ്യതയുണ്ട്. വാരത്തിന്റെ അവസാനത്തിൽ ബിസിനസ്സിൽ പുരോഗതി, ഭാഗ്യാനുഭവങ്ങൾ, പുതിയ വസ്ത്രങ്ങളും ആഭരണങ്ങളും ലഭിക്കാനുള്ള യോഗം എന്നിവ പ്രതീക്ഷിക്കാം.
ചിങ്ങം രാശി (മകം, പൂരം, ഉത്രം ആദ്യ കാൽഭാഗം):
വാരത്തിന്റെ തുടക്കം രോഗദുരിതങ്ങളിൽ നിന്നും ആശ്വാസം നൽകും. സ്ഥാനലബ്ധി, ഭാഗ്യാനുഭവങ്ങൾ, ധനനേട്ടം, നല്ല പേര് സമ്പാദിക്കാനുള്ള യോഗം, ഭക്ഷണ സൗഖ്യം, സമ്മാനങ്ങളോ അംഗീകാരങ്ങളോ ലഭിക്കാനുള്ള സാധ്യത എന്നിവയുണ്ട്. വാരമധ്യത്തോടെ പ്രവർത്തനങ്ങളിൽ മാന്ദ്യം അനുഭവപ്പെടാനും ദാമ്പത്യ ഐക്യം കുറയാനും മാനസിക ബുദ്ധിമുട്ടുകൾ ഉണ്ടാകാനും സാധ്യതയുണ്ട്. വാരത്തിന്റെ അവസാനത്തോടെ ശത്രുക്കളെ അതിജീവിച്ച് വ്യവഹാരങ്ങളിൽ വിജയം നേടും. മനഃസന്തോഷം, ആരോഗ്യ വർധനവ്, തൊഴിൽ വിജയം, ധനനേട്ടം, ദാമ്പത്യ ഐക്യം എന്നിവയും ഉണ്ടാകും.
കന്നി രാശി (ഉത്രം അവസാന മുക്കാൽഭാഗം, അത്തം, ചിത്തിര ആദ്യ പകുതിഭാഗം):
വാരത്തിന്റെ തുടക്കത്തിൽ രോഗങ്ങൾ അലട്ടാനും സാമ്പത്തിക നഷ്ടം, ശരീര ശോഷണം, കാര്യതടസ്സങ്ങൾ, അലച്ചിൽ, ബന്ധുജനങ്ങളുമായി അഭിപ്രായ വ്യത്യാസം എന്നിവ ഉണ്ടാകാനും സാധ്യതയുണ്ട്. എന്നാൽ വാരമധ്യത്തോടെ അപ്രതീക്ഷിതമായ ധനലാഭം ഉണ്ടാകും. ഭക്ഷണ സൗഖ്യം, തൊഴിലിൽ വിജയം, വസ്ത്രങ്ങളും ആഭരണങ്ങളും സമ്മാനമായി ലഭിക്കാനുള്ള സാധ്യത എന്നിവയും കാണുന്നു. വാരത്തിന്റെ അവസാനത്തിൽ കുടുംബത്തിൽ ആരോഗ്യപ്രശ്നങ്ങളോ മനഃസ്വസ്ഥത കുറവോ ഉണ്ടാകാൻ സാധ്യതയുണ്ട്. നേത്രരോഗങ്ങളുള്ളവർ പ്രത്യേകം ശ്രദ്ധിക്കുക.
തുലാം രാശി (ചിത്തിര അവസാന പകുതിഭാഗം, ചോതി, വിശാഖം ആദ്യ മുക്കാൽഭാഗം):
വാരത്തിന്റെ തുടക്കത്തിൽ രോഗദുരിതങ്ങൾ, അനാവശ്യമായ കൂട്ടുകെട്ടുകൾ, അപവാദം, സാമ്പത്തിക നഷ്ടം എന്നിവയ്ക്ക് സാധ്യതയുണ്ട്. എന്നാൽ വാരമധ്യത്തോടെ മനസ്സിൽ വിചാരിക്കുന്ന കാര്യങ്ങൾ അവിശ്വസനീയമായ രീതിയിൽ നടക്കാൻ സാധ്യതയുണ്ട്. ദാമ്പത്യ സൗഖ്യം, കീർത്തി, ഉന്നത സ്ഥാനലബ്ധി, തൊഴിൽ വിജയം, ധനലാഭം എന്നിവയും പ്രതീക്ഷിക്കാം. കുടുംബത്തിൽ മംഗളകരമായ കാര്യങ്ങൾ നടക്കാനും ബന്ധുജനങ്ങളുമായി അടുത്തിടപഴകാനും മനഃസന്തോഷം നേടാനും നല്ല സുഹൃത്തുക്കളെ ലഭിക്കാനും ഭക്ഷണ സൗഖ്യത്തിനും സാധ്യതയുണ്ട്.
വൃശ്ചികം രാശി (വിശാഖം അവസാന കാൽഭാഗം, അനിഴം, തൃക്കേട്ട):
ഈ വാരം ഗുണദോഷ സമ്മിശ്രമായിരിക്കും. വാരത്തിന്റെ തുടക്കത്തിൽ തൊഴിൽ വിജയം, ദാമ്പത്യ ഐക്യം എന്നിവ പ്രതീക്ഷിക്കാം. വളരെക്കാലമായി കാണാതിരുന്ന ബന്ധുക്കളെയോ സുഹൃത്തുക്കളെയോ കണ്ടുമുട്ടാൻ സാധ്യതയുണ്ട്. വാരമധ്യത്തോടെ അനാവശ്യമായ കൂട്ടുകെട്ടുകൾ മൂലം കുടുംബ ജീവിതത്തിൽ പ്രശ്നങ്ങളുണ്ടാകാനും ആരോഗ്യപ്രശ്നങ്ങൾക്ക് സാധ്യതയുമുണ്ട്. വരുമാനത്തെക്കാൾ കൂടുതൽ ചെലവുകൾ സാമ്പത്തിക ബാധ്യതയിലേക്ക് നയിക്കും. എന്നാൽ വാരത്തിന്റെ അവസാനത്തിൽ കുടുംബത്തിൽ സമാധാനപരമായ അന്തരീക്ഷം രൂപപ്പെടും. തൊഴിലില്ലാത്ത യുവതി-യുവാക്കൾക്ക് അർഹമായ തൊഴിലവസരങ്ങൾ വന്നുചേരാൻ സാധ്യതയുണ്ട്..
ധനു രാശി (മൂലം, പൂരാടം, ഉത്രാടം ആദ്യ കാൽഭാഗം):
കോടതി വ്യവഹാരങ്ങളിൽ ഉൾപ്പെട്ട സ്വത്തു സംബന്ധമായ വിഷയങ്ങളിൽ വിജയം നേടാൻ സാധ്യതയുണ്ട്. കുടുംബത്തിൽ മംഗളകരമായ കാര്യങ്ങൾക്ക് സാധ്യത കാണുന്നു. തൊഴിലിൽ വിജയവും ബിസിനസ്സിൽ ലാഭവും ഭക്ഷണ സൗഖ്യവും വാഹനഭാഗ്യവും പ്രതീക്ഷിക്കാം. കലാസാഹിത്യ മേഖലകളിൽ പ്രവർത്തിക്കുന്നവർക്ക് അംഗീകാരങ്ങളും സമ്മാനങ്ങളും ലഭിക്കാൻ സാധ്യതയുണ്ട്. എന്നിരുന്നാലും, വാരാന്ത്യത്തിൽ ശരീരസൗഖ്യം കുറയാനും ബന്ധുജനങ്ങളുമായി കലഹങ്ങൾ ഉണ്ടാകാനും സാധ്യതയുണ്ട്.
മകരം രാശി (ഉത്രാടം അവസാന മുക്കാൽഭാഗം, തിരുവോണം, അവിട്ടം ആദ്യ പകുതിഭാഗം):
വാരത്തിന്റെ തുടക്കത്തിൽ തൊഴിൽപരമായ യാത്രകൾ മൂലമുള്ള ക്ലേശങ്ങൾക്കും കുടുംബത്തിൽ നിന്ന് അകന്ന് ദൂരദേശത്ത് താമസിക്കേണ്ടി വരുന്നതിനും സാധ്യതയുണ്ട്. വാഹനങ്ങൾ ശ്രദ്ധയോടെ ഉപയോഗിക്കുക. വാരമധ്യത്തോടെ വിദേശയാത്രയ്ക്കുള്ള സാധ്യത കാണുന്നു. രോഗശാന്തിയും ശത്രുക്കളുടെ മേൽ വിജയവും നേടും. വളരെക്കാലമായി പിണങ്ങിയിരുന്ന ബന്ധുക്കളുമായി അകൽച്ച മാറുകയും അവരിൽ നിന്ന് ഗുണഫലങ്ങൾ ലഭിക്കുകയും ചെയ്യും. എല്ലായിടത്തും മാന്യത ലഭിക്കാനും അധികാര സ്ഥാനങ്ങളുള്ള തൊഴിൽ ലഭിക്കാനും അല്ലെങ്കിൽ സ്ഥാനക്കയറ്റത്തിനും സാധ്യതയുണ്ട്. വാരത്തിന്റെ അവസാനത്തിൽ കുടുംബത്തിൽ ആരോഗ്യപ്രശ്നങ്ങൾ ഉണ്ടാകാൻ ഇടയുണ്ട്.
കുംഭം രാശി (അവിട്ടം അവസാന പകുതിഭാഗം, ചതയം, പൂരൂരുട്ടാതി ആദ്യ മുക്കാൽഭാഗം):
വാരത്തിന്റെ തുടക്കത്തിൽ ജീവിത പങ്കാളിയിൽ നിന്നും സന്താനങ്ങളിൽ നിന്നും അകന്നു കഴിയാനും ദൂരദേശത്ത് താമസിക്കേണ്ടി വരാനും സാധ്യതയുണ്ട്. എന്നാൽ വാരമധ്യത്തോടെ വിവാഹ ഭാഗ്യം, പുതിയ വസ്ത്രങ്ങൾ ലഭിക്കാനുള്ള സാധ്യത, ഭൂമി വർധനവ്, ധനനേട്ടം, വാഹനഭാഗ്യം, ശത്രുക്കളെ അതിജീവിക്കാനുള്ള കഴിവ്, ദാമ്പത്യ ഐക്യം, പ്രണയ സാഫല്യം എന്നിവയുണ്ടാകും. വിദ്യാർത്ഥികളിൽ പഠനത്തിൽ ഉണർവ്വ് ഉണ്ടാകും. ഈശ്വരവിശ്വാസം വർധിക്കുകയും പുണ്യ സ്ഥലങ്ങൾ സന്ദർശിക്കാൻ അവസരം ലഭിക്കുകയും ചെയ്യും.
മീനം രാശി (പൂരൂരുട്ടാതി അവസാന കാൽഭാഗം, ഉതൃട്ടാതി, രേവതി):
പ്രണയ സംബന്ധമായ കാര്യങ്ങളിൽ കുടുംബത്തിൽ നിന്നുള്ള എതിർപ്പ് മാറി അനുകൂലമായ സാഹചര്യം രൂപപ്പെടും. ദാമ്പത്യ ഐക്യവും വാഹനഭാഗ്യവും പ്രതീക്ഷിക്കാം. ശത്രുക്കളിൽ നിന്നുള്ള ഉപദ്രവം വർധിക്കാൻ സാധ്യതയുണ്ട്. ബന്ധുജനങ്ങളുമായുള്ള അഭിപ്രായ വ്യത്യാസങ്ങൾ നിയമപരമായ പ്രശ്നങ്ങളിലേക്ക് നീങ്ങിയേക്കാം. വായ്പാ സംബന്ധമായ കാര്യങ്ങളിൽ വീഴ്ചകൾ സംഭവിക്കാതെ ശ്രദ്ധിക്കുക. വാരത്തിന്റെ അവസാനത്തിൽ കലാകാരന്മാർക്ക് അംഗീകാരങ്ങളും പുരസ്കാരങ്ങളും തേടിയെത്തും.
അറിയിപ്പ്:
പൊതുഫലങ്ങൾ ആ കൊടുത്തിരിക്കുന്ന നിശ്ചിത കാലയളവിലെ പൊതു ഗ്രഹനിലയെ അടിസ്ഥാനമാക്കിയുള്ള പ്രവചനങ്ങളാണ്. ഓരോ വ്യക്തിയും അനുഭവയോഗത്തിൽ വരുന്ന ഫലങ്ങൾ, ആ സമയത്തെ പൊതു ഗ്രഹനിലയ്ക്ക് പുറമെ ആ വ്യക്തിയുടെ ജനന സമയത്തെ ഗ്രഹനില, അതിൽ നിന്നുണ്ടാകുന്ന യോഗങ്ങൾ, നിലവിലെ ദശാപഹാരം അന്തരപഹാരങ്ങൾ എന്നിവയെയൊക്കെ ആശ്രയിച്ചിരിക്കും. എന്നിരുന്നാലും, ഇവിടെ കൊടുത്തിരിക്കുന്ന പൊതുഫലങ്ങളെ ഒരു സൂചനയായി ഉപയോഗിച്ചു, വിശദമായ ജാതക വിശകലനം നടത്തി ദശാനാഥനെ പ്രീതിപ്പെടുത്താനുള്ള വഴികൾ തേടുകയും ദോഷപരിഹാരങ്ങൾ അനുഷ്ഠിക്കുകയും ചെയ്താൽ, അനുകൂല സമയങ്ങളുടെ ഗുണഫലങ്ങൾ പരമാവധി നേടിയെടുക്കാനും പ്രതികൂല സമയങ്ങളിൽ മുൻകരുതലോടെ സുഗമമായി തരണം ചെയ്യാനും സാധിക്കും.
